Missale Romanum > Proprium de Sanctis > Festa Augusti > Eadem die 9 Augusti. In Vigilia S. Laurentii Martyris
EADEM DIE 9 Augusti
in vigilia s. laurentii
martyris
Semiduplex
Introitus Ps. 111, 9
D
ispérsit, dedit paupéribus : justítia ejus manet in saéculum saéculi : cornu ejus exaltábitur in glória. Ps. ibid., 1. Beátus vir, qui timet Dóminum : in mandátis ejus cupit nimis. V). Glória Patri. Dispérsit.
Non dicitur Glória in excélsis.
A
désto, Dómine, supplicatiónibus nostris : et inter-cessióne beáti Lauréntii Mártyris tui, cujus praévénimus festivitátem; perpétuam nobis misericór-diam benígnus impénde. Per Dóminum.
In Missa conventuali additur, juxta Rubricas, 2ª Oratio de sancta Maria Concéde, et 3ª contra persecutores Ecclesiæ, vel pro Papa supra.[↑]
Léctio libri Sapiéntiæ
Eccli. 51, 1-8 et 12
C
onfitébor tibi, Dómine, Rex, et collaudábo te Deum, Salvatórem meum. Confitébor nómini tuo : quóniam adjútor et protéctor factus es mihi, et liberásti corpus meum a perditióne, a láqueo linguæ iníquæ et a lábiis operántium mendácium, et in conspéctu astántium factus es mihi adjútor. Et liberásti me secúndum multitúdinem misericórdiæ nóminis tui a rugiéntibus, præparátis ad escam, de mánibus quæréntium ánimam meam, et de portis tribulatiónum, quæ circumdedérunt me : a pressúra flammæ, quæ circúmdedit me, et in médio ignis non sum æstuátus : de altitúdine ventris ínferi, et a lingua coinquináta, et a verbo mendácii, a rege iníquo, et a lingua injústa : laudábit usque ad mortem ánima mea Dóminum : quóniam éruis sustinéntes te, et líberas eos de mánibus géntium, Dómine, Deus noster.
Graduale. Ps. 111, 9 et 2. Dispersit, dedit paupéribus : justítia ejus manet in saéculum saéculi. V). Potens in terra erit semen ejus : generátio rectórum benedicétur.
Sequéntia sancti Evangélii secúndum
Matthaéum Matth. 16, 24-27
I
n illo témpore : Dixit Jesus discípulis suis : Si quis vult post me veníre, ábneget semetípsum, et tollat crucem suam, et sequátur me. Qui enim volúerit ánimam suam salvam fácere, perdet eam : qui autem perdíderit ánimam suam propter me, invéniet eam. Quid enim prodest hómini, si mundum univérsum lucrétur, ánimæ vero suæ detriméntum patiátur? Aut quam dabit homo commutatiónem pro ánima sua? Fílius enim hóminis ventúrus est in glória Patris sui cum Angelis suis : et tunc reddet unicuíque secúndum ópera ejus.
Offertorium. Job 16, 20. Orátio mea munda est : et ídeo peto, ut detur locus voci meæ in cælo : quia ibi est judex meus, et cónscius meus in excélsis : ascéndat ad Dóminum deprecátio mea.
Secreta
H
óstias, Dómine, quas tibi offérimus, propítius súscipe : et, intercedénte beáto Lauréntio Mártyre tuo, víncula peccatórum nostrorum absólve. Per Dóminum.
Aliae Secretæ, ut supra notatur.
Communio. Matth. 16, 24. Qui vult veníre post me, ábneget semetípsum, et tollat crucem suam, et sequátur me.
Postcommunio
D
a, quaésumus, Dómine, Deus noster : ut, sicut beáti Lauréntii Mártyris tui commemoratióne, temporáli gratulámur offício; ita perpétuo lætémur aspéctu. Per Dóminum.
Aliæ Postcommuniones, ut supra notatur.
Item eadem die 9 Augusti. Pro S. Romano Mart.
Scribe | Ad paginam principalem
© 2001 - 2014 Coordinamento di Una Voce delle Venezie. All Rights Reserved.