Missale Romanum > Proprium de Sanctis > Festa Novembris > Die 1 Novembris. IN FESTO OMNIUM SANCTORUM
FESTA NOVEMBRIS
Die 1 Novembris
IN FESTO
OMNIUM SANCTORUM
Duplex I classis cum Octava communi
Introitus
G
audeámus omnes in Dómino, diem festum celebrántes sub honóre Sanctórum ómnium : de quorum sollemnitáte gaudent Angeli, et colláudant Fílium Dei. Ps. 32, 1. Exsultáte, justi, in Dómino : rectos decet collaudátio. V). Glória Patri. Gaudeámus.
O
mnípotens sempitérne Deus, qui nos ómnium Sanctórum tuórum mérita sub una tribuísti celebritáte venerári : quaésumus; ut desiderátam nobis tum propitiatiónis abundántiam, multiplicátis intercessóribus, largiáris. Per Dóminum.
Léctio libri Apocalýpsis beáti Joánnis
Apóstoli Apoc. 7, 2-12
I
n diébus illis: Ecce ego Joánnes vidi álterum Angelum ascendéntem ab ortu solis, habéntem signum Dei vivi : et clamávit voce magna quatuor Angelis, quibus datum est nocére terræ, et mari, dicens : Nolite nocére terræ, et mari, neque arbóribus, quoadúsque signémus servos Dei nostri in fróntibus eórum. Et audivi númerum signatórum, centun quadragínta quatuor míllia signáti, ex omni tribu filiórum Israël. Ex tribu Juda duódecim millia signáti. Ex tribu Ruben duódecim míllia signáti. Ex tribu Gad duódecim míllia signáti. Ex tribu Aser duódecim míllia signáti. Ex tribu Néphthali duódecim millia signáti. Ex tribu Manásse duódecim míllia signáti. Ex tribu Símeon duódecim míllia signáti. Ex tribu Levi duódecim millia signáti. Ex tribu Issachar duódecim millia signáti. Ex tribu Zabulon duódecim míllia signáti. Ex tribu Joseph duódecim signáti. Ex tribu Bénjamin duódecim míllia signáti. Post hæc vidi turbam magnam, quam dinumeráre nemo póterat, ex ómnibus géntibus, et tríbubus, et pópulis, et linguis : stantes ante thronum, et in conspéctu Agni, amícti stolis albis, et palma in mánibus eórum : et clamábant voce magna, dicéntes : Salus Deo nostro, qui sedet super thronum, et Agno. Et omnes Angeli stabant in circúitu throni, et seniórum, et quatuor animálium : et cecidérunt in conspéctu throni in facies suas, et adoravérunt Deum, dicéntes : Amen. Benedíctio, et cláritas, et sapiéntia, et gratiárum áctio, honor, et virtus, et fortitúdo Deo nostro in saécula sæculórum. Amen.
Graduale. Ps. 33, 10 et 11. Timéte Dóminum, omnes sancti ejus : quóniam nihil deest timéntibus eum. V). Inquiréntes autem Dóminum, non defícient omni bono.
Allelúja, allelúja. V). Matth. 11, 28. Venite ad me, omnes qui laborátis, et oneráti estis : et ego refíciam vos. Allelúja.
Sequéntia sancti Evangélii secúndum
Matthaéum Matth. 5, 1-12
I
n illo témpore : Videns Jesus turbas, ascéndit in montem, et, cum sedísset, accessérunt ad eum discípuli ejus, et apériens os suum, docébat eos, dicens : Beáti páuperes spíritu : quóniam ipsórum est regnum caelórum. Beáti mites quóniam ipsi possidébunt terram. Beáti qui lugent : quóniam ipsi consolabúntur. Beáti qui esúriunt et sítiunt justítiam : quóniam ipsi saturabúntur. Beáti misericórdes : quóniam ipsi misericórdiam consequéntur. Beáti mundo corde : quóniam ipsi Deum vidébunt. Beáti pacifici : quóniam fílii Dei vocabúntur. Beáti qui persecutiónem patiúntur propter justítiam : quóniam ipsórum est regnum cælórum. Beáti estis cum maledíxerint vobis, et persecúti vos fúerint, et díxerint omne malum advérsum vos, mentiéntes, propter me : gaudéte, et exsultáte, quóniam merces vestra copiósa est in cælis.
Credo.
Offertorium. Sap. 3, 1-2 et 3. Justórum ánimæ in manu Dei sunt, et non tanget illos torméntum mortis : visi sunt óculis insipiéntium mori : illi autem sunt in pace, allelúja.
Secreta
M
únera tibi, Dómine, nostræ devotiónis offérimus : quæ et pro cunctórum tibi grata sint honóre justórum, et nobis salutária, te miseránte, reddántur. Per Dóminum.
Communio. Matth. 5, 8-10. Beáti mundo corde, quóniam ipsi Deum vidébunt : beáti pacífici, quóniam fílii Dei vocabúntur : beáti qui persecutiónem patiúntur propter justítiam, quóniam ipsórum est regnum cælórum.
Postcommunio
D
a quaésumus, Dómine, fidélibus pópulis ómnium Sanctórum semper veneratióne lætári : et eórum perpétua supplicatióne muníri. Per Dóminum.
Infra Octavam Missa ut in Festo, et pro Orationibus juxta diversitatem Temporum assignatis, dicitur 2ª Oratio de Spiritu Sancto, 3ª contra persecutores Ecclesiæ vel pro Papa supra. [↑]
MISSA VOTIVA
DE OMNIBUS SANCTIS
Extra Tempus Paschale :
Introitus Sap. 3, 8
J
údicant sancti gentes, et dominátur pópulis : et regnábit Dóminus Deus illórum in perpétuum. Ps. 32, 1. Exsultáte, justi, in Dómino : rectos decet collaudátio. V). Glória Patri. Júdicant.
Vel Tempore Paschali :
Introitus Ps. 144, 10-11
S
ancti tui, Dómine, benedícent te : glóriam regni tui dicent, allelúja, allelúja. Ps. ibid., 1. Exaltábo te, Deus meus Rex : et benedícam nómini tuo in saéculum, et in saéculum saéculi. V). Glória Patri. Sancti.
Oratio
C
oncéde, quaésumus, omnípotens Deus : ut intercéssio sanctæ Dei Genitrícis Maríæ, sanctorúmque ómnium Apostolórum, Mártyrum, Confessórum, atque Vírginum et ómnium electórum tuórum, nos ubique lætíficet; ut, dum eórum mérita recólimus, patrocínia sentiámus. Per eúndem Dóminum.
2ª Oratio de Spiritu Sancto, et 3ª contra persecutores Ecclesiæ vel pro Papa supra. [↑]
Epistola ut in Festo supra. [↑]
Graduale. Ps. 33, 10 et 11. Timéte Dóminum, omnes sancti ejus : quóniam nihil deest timéntibus eum. V). Inquiréntes autem Dóminum, non defícient omni bono.
Allelúja, allelúja. V). Matth. 11, 28. Venite ad me, omnes qui laborátis, et oneráti estis : et ego refíciam vos. Allelúja.
Post Septuagesimam, omissis Allelúja, et Versu seguenti, dicitur
Tractus. Ps. 125, 5-6. Qui séminant in làcrimis, in gaudio metent. V). Eúntes ibant et flebant, mitténtes sémina sua. V). Veniéntes autem vénient cum exsultatióne, portántes manípulos suos.
Tempore autem Paschali omittitur Graduale, et ejus loco dicitur :
Allelúja, allelúja. V). Sancti tui, Dómine, florébunt sicut lílium : et sicut odor bálsami erunt ante te. Allelúja. V). Ps. 115, 15. Pretiósa in conspéctu Dómini mors sanctórum ejus. Allelúja.
Evangelium ut in Festo supra. [↑]
Offertorium. Sap. 3, 1-2 et 3. Justórum anime in manu Dei sunt, et non tanget illos torméntum malítiæ : visi sunt óculis insipiéntium mori : illi autem sunt in pace, allelúja.
Tempore Paschali dicitur sequens
Offertorium. Ps. 31, 11. Lætámini in Dómino, et ex-sultáte, justi : et gloriámini omnes recti corde, allelúja, allelúja.
Secreta
O
oblátis, Dómine, placáre munéribus : et, interce-dénte beáta Maria semper Vírgine, cum ómnibus Sanctis tuis, a cunctis nos defénde perículis. Per Dóminum.
Aliæ Secretæ, ut supra. [↑]
Communio. Matth. 5, 8-10. Beáti mundo corde, quóniam ipsi Deum vidébunt : beáti pacífici, quóniam fílii Dei vocabúntur : beáti qui persecutiónem patiúntur propter justítiam, quóniam ipsórum est regnum cælórum.
Tempore Paschali dicitur sequens
Communio. Ps. 32, 1. Gaudéte, justi, in Dómino, allelúja : rectos decet collaudátio, allelúja.
Postcommunio
S
úmpsimus, Dómine, beátæ Maríæ semper Vírginis et ómnium Sanctórum tuórum memóriam recoléntes, sacraménta cæléstia : præsta, quaésumus; ut, quod temporáliter gérimus, ætérnis gáudiis consequámur. Per Dóminum.
Aliæ Postcommuniones, ut supra. [↑]
Die 2 Novembris. In Commemoratione Omnium Fidelium Defunctorum
Scribe | Ad paginam principalem
© 2001 - 2014 Coordinamento di Una Voce delle Venezie. All Rights Reserved.